HuquqTech
Navoiy tumani tarkibidagi Karmana shahrining qadimiy shuhratini tiklash, tarixiy obidalarini qayta taʼmirlash imkoniyatini kengaytirish, madaniy-maishiy, iqtisodiy salohiyatini yuksaltirish, ijtimoiy infratuzilmasini rivojlantirish maqsadida, shuningdek, uning amalda Navoiy shahri hududi bilan tutashib ketganligidan kelib chiqib hamda mahalliy aholining xohish-istagini inobatga olib:
1. Navoiy viloyati hokimligining Navoiy shahri tarkibida Karmana tumanini tuzish toʻgʻrisidagi iltimosi qondirilsin.
2. Belgilab qoʻyilsinki, Navoiy shahri va Navoiy tumani chegaralari Karmana shahrining hozirgi hududi hamda Navoiy shahrining bir qismi negizida Karmana tumani tashkil etilganligini hisobga olgan holda oʻzgartiriladi.
3. Navoiy shahri va Navoiy tumanining chegaralarini oʻzgartirish, Karmana tumanini tashkil qilish Oʻzbekiston Respublikasi Konstitutsiyasining 78-moddasi 23-bandiga muvofiq Oliy Majlisga kiritilsin.
4. Navoiy shahrining Karmana tumanini tuzish tadbiriga bogʻliq masalalar bilan shugʻullanuvchi Respublika komissiyasi ilovaga* muvofiq tuzilsin.
* Ilova berilmaydi.
5. Respublika komissiyasi:
— Oʻzbekiston Respublikasi Davlat arxitektura va qurilish qoʻmitasi bilan birgalikda joriy yil oxirigacha Navoiy shahri tarkibida Karmana tumani tashkil etilganini hisobga olgan holda Navoiy shahrini kelgusida rivojlantirish bosh rejasiga tuzatishlar kiritsin;
— Navoiy viloyati hokimligi, Oʻzbekiston Respublikasi Kommunal xizmat koʻrsatish vazirligi, “Qizilqumnodirmetalloltin” konserni bilan birgalikda Navoiy shahrining suv, elektr taʼminoti, kanalizatsiya hamda markazlashtirilgan issiqlik taʼminoti yagona tarmogʻini qayta taʼmirlash va shakllantirish tadbirlarini Karmana tumani tashkil etilganini hisobga olgan holda bir oy muddatda ishlab chiqsin va tasdiqlasin;
— Navoiy viloyati hokimligi, Oʻzbekiston Respublikasi Makroiqtisodiyot va statistika vazirligi, Kommunal xizmat koʻrsatish vazirligi bilan birgalikda korxonalar va tashkilotlarning ulushli mablagʻlarini, shuningdek, budjetdan mablagʻ bilan taʼminlash markazlashtirilgan manbalarini jalb etish asosida Karmana tumanini Navoiy shahrining markaziy qismi bilan bogʻlovchi trolleybus yoʻlining birinchi navbati qurilishini 2000-yilda tugallashni taʼminlasin;
— Navoiy viloyati hokimligi, “Oʻzavtoyoʻl” Davlat konserni bilan birgalikda Karmana tumanining magistral yoʻllarini qayta taʼmirlash va shahar ichidagi yoʻllarini kengaytirish tadbirlarini bir oy muddatda ishlab chiqsin va tasdiqlasin;
— Navoiy viloyati hokimligi, Oʻzbekiston Respublikasi Madaniyat ishlari vazirligi bilan birgalikda homiylar va budjet mablagʻlarini jalb etgan holda Mirsaid Bahrom maqbarasi, Hazrat Qosim Shayx maqbarasi majmui, Shayx Xoʻja Husrav maqbarasi, Mirza-chorbogʻ yodgorliklarini qayta taʼmirlash dasturini ikki oy muddatda ishlab chiqsin va tasdiqlasin.
6. Oʻzbekiston Respublikasi Vazirlar Mahkamasi bir hafta muddatda ushbu Farmon yuzasidan qaror qabul qilsin.
7. Ushbu Farmonning bajarilishini nazorat qilish Oʻzbekiston Respublikasi Bosh vaziri Oʻ. Sultonov zimmasiga yuklatilsin.
Oʻzbekiston Respublikasining Prezidenti I. KARIMOV
Toshkent sh.,
1999-yil 27-may,
PF-2323-son