HuquqTech
Toshkent viloyati tarkibida Toshkent tumani, shuningdek viloyatga boʻysunuvchi Yangiyoʻl, Ohangaron va Nurafshon shahar hokimliklarini tashkil etish maqsadida:
1. Oʻzbekiston Respublikasi Oliy Majlisi Qonunchilik palatasining 2017-yil 27-iyuldagi 974-III-son, 18-avgustdagi 1050-III-son, 1051-III-son va 1052-III-son hamda Oʻzbekiston Respublikasi Oliy Majlisi Senati Kengashining 2017-yil 27-iyuldagi KQ-211-III-son, Oliy Majlis Senatining 24-avgustdagi SQ-207-Sh-son, SQ-208-III-son, SQ-209-III-son va 25-avgustdagi SQ-222-III-son qarorlari maʼlumot uchun qabul qilinsin.
2. Toshkent viloyati tarkibida Toshkent tumani, shuningdek viloyatga boʻysunuvchi Yangiyoʻl, Ohangaron va Nurafshon shahar hokimliklari tashkil etilsin.
Tashkil etilgan tuman va shaharlar hokimliklari boshqaruv apparatining tuzilmasi hamda boshqaruv xodimlarining cheklangan soni Oʻzbekiston Respublikasi Prezidentining “Mahalliy ijroiya hokimiyati organlari faoliyatini yanada takomillashtirish toʻgʻrisida” 2016-yil 22-dekabrdagi PQ-2691-son qarori doirasida belgilansin.
3. Toshkent viloyati tarkibida Toshkent tumani, shuningdek viloyatga boʻysunuvchi Yangiyoʻl, Ohangaron va Nurafshon shahar hokimliklarini tashkil etish bilan bogʻliq tashkiliy masalalarni hal etish boʻyicha respublika komissiyasi (keyingi oʻrinlarda Respublika komissiyasi deb ataladi) tarkibi 1-ilovaga muvofiq tasdiqlansin.
4. Respublika komissiyasi (A.J. Ramatov):
oʻn kun muddatda Toshkent viloyati tarkibida Toshkent tumani, shuningdek viloyatga boʻysunuvchi Yangiyoʻl, Ohangaron va Nurafshon shahar hokimliklarini tashkil etish bilan bogʻliq zarur tashkiliy texnik tadbirlar kompleksini ishlab chiqsin va belgilangan muddatlarda amalga oshirilishini taʼminlasin;
bir oy muddatda Oʻzbekiston Respublikasi Iqtisodiyot vazirligi, Moliya vazirligi, Toshkent viloyati hokimligi bilan birgalikda Toshkent tumani, Yangiyoʻl, Ohangaron va Nurafshon shaharlari budjetlarining va ularni ijtimoiy-iqtisodiy rivojlantirishning prognoz parametrlarini belgilasin;
Toshkent viloyati hokimligi bilan birgalikda Toshkent tumani, Yangiyoʻl, Ohangaron va Nurafshon shaharlarini tashkil etish davrida iqtisodiyot tarmoqlarining aniq, barqaror va bir maromda ishlashini, shuningdek yuzaga keladigan ijtimoiy masalalarning oʻz vaqtida hal etilishini taʼminlasin;
Toshkent viloyati hokimligi Oʻzbekiston Respublikasi Bandlik va mehnat munosabatlari vazirligi bilan birgalikda Toshkent viloyati tarkibida Toshkent tumanini tashkil etilishi hamda Yangiyoʻl, Ohangaron va Nurafshon shaharlarining viloyatga boʻysunuvchi shaharlar turkumiga kiritilishi munosabati bilan yangidan tashkil etilayotgan davlat va xoʻjalik boshqaruvi organlari hududiy tuzilmalarini koʻp yillik tajribaga ega boʻlgan malakali kadrlar bilan toʻldirish, shuningdek Yangiyoʻl, Ohangaron va Zangiota tumanlaridagi mavjud shtatlarning qisqarishi natijasida boʻshab qolayotgan shaxslarni ishga joylashtirish chora-tadbirlarini koʻrsin;
bir oy muddatda Toshkent viloyati hokimligi Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Moliya vazirligi bilan birgalikda Toshkent tumani, Yangiyoʻl, Ohangaron va Nurafshon shahar hokimliklarini zarur bino va inshootlar hamda moddiy-texnika vositalari bilan taʼminlash boʻyicha Oʻzbekiston Respublikasi Vazirlar Mahkamasiga taklif kiritsin.
5. Davlat va xoʻjalik boshqaruvi organlarining shahar va tumanlar boʻlinmalari roʻyxati hamda ularga qoʻshimcha kiritilayotgan boshqaruv xodimlarining cheklangan soni 2-ilovaga muvofiq tasdiqlansin.
6. Oʻzbekiston Respublikasi Davlat statistika qoʻmitasi statistika koʻrsatkichlarini shakllantirish hamda yuritishda tashkil etilayotgan Toshkent tumani, viloyatga boʻysunuvchi shaharlar turkumiga kiritilayotgan Yangiyoʻl, Ohangaron va Nurafshon shaharlarining maʼmuriy hududlarini inobatga olsin.
7. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi Toshkent viloyati hokimligiga boʻysunuvchi Toshkent tumani, Yangiyoʻl, Ohangaron va Nurafshon shahar hokimliklari tashkil etilishi natijasida ularning maʼmuriy hududiy chegaralari oʻzgarganligi munosabati bilan belgilangan tartibda yer hisobotlariga tegishli oʻzgartirishlar kiritsin.
8. Oʻzbekiston Respublikasi Bosh prokuraturasi va Ichki ishlar vazirligi ikki oy muddatda tashkil etilayotgan viloyatga boʻysunuvchi Toshkent tumani, Yangiyoʻl, Ohangaron va Nurafshon shaharlarida huquqni muhofaza qiluvchi organlarning tuzilmalarini tashkil etish masalasini koʻrib chiqsin.
9. Oʻzbekiston Respublikasi Adliya vazirligi Moliya vazirligi bilan birgalikda Toshkent tumani, Yangiyoʻl, Ohangaron va Nurafshon shaharlarida fuqarolik holati dalolatnomalarini yozish organlari va davlat notarial idoralarini, “Yagona darcha” markazlarini tashkil etish masalasini koʻrib chiqib, tegishli tadbirlarni amalga oshirsin.
10. Oʻzbekiston Respublikasi Moliya vazirligi manfaatdor vazirlik va idoralar bilan birgalikda bir oy muddatda qonun hujjatlariga ushbu qarordan kelib chiquvchi oʻzgartirish va qoʻshimchalar kiritish boʻyicha Vazirlar Mahkamasiga taklif kiritsin.
11. Mazkur qarorni bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov, Oʻzbekiston Respublikasi Davlat maslahatchisi U.S. Ismailov va Toshkent viloyati hokimi vazifasini bajaruvchisi Gʻ.I. Ibragimov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2017-yil 3-noyabr,
PQ-3375-son
Oʻzbekiston Respublikasi Prezidentining 2017-yil 3-noyabrdagi PQ-3375-son qaroriga 1-ILOVA
Toshkent viloyati tarkibida Toshkent tumanini tuzish, shuningdek viloyatga boʻysunuvchi Yangiyoʻl, Ohangaron va Nurafshon shahar hokimliklarini tashkil etish bilan bogʻliq tashkiliy masalalarni hal etish boʻyicha respublika komissiyasi
Izoh: Komissiya aʼzolari boshqa ishga oʻtgan taqdirda uning oʻrniga ushbu lavozimga yangidan tayinlangan shaxslar yoki tegishli funksiyalarni bajarish yuklatilgan shaxslar kiritiladi.
(1-ilova Oʻzbekiston Respublikasi Prezidentining 2018-yil 1-avgustdagi PF-5497-sonli Farmoni tahririda)
Oʻzbekiston Respublikasi Prezidentining 2017-yil 3-noyabrdagi PQ-3375-son qaroriga 2-ILOVA
Davlat va xoʻjalik boshqaruvi organlarining shahar va tumanlar boʻlinmalari roʻyxati hamda ularga qoʻshimcha kiritilayotgan boshqaruv xodimlarining cheklangan soni
* Oʻzbekiston Respublikasi Prezidentining qarori bilan tasdiqlangan boshqaruv xodimlari cheklangan soni doirasida belgilanadi.
** Oʻzbekiston Respublikasi Prezidenti hamda Vazirlar Mahkamasining qarorlari bilan boshqaruv xodimlari cheklangan soniga qoʻshimchalar kiritiladi.
(2-ilova Oʻzbekiston Respublikasi Prezidentining 2018-yil 1-avgustdagi PF-5497-sonli Farmoni tahririda)