Xalqaro shartnomani tasdiqlash toʻgʻrisida

“Oʻzbekiston Respublikasining xalqaro shartnomalari toʻgʻrisida”gi Oʻzbekiston Respublikasi Qonunining 22-moddasiga muvofiq qaror qilaman:

1. 2025-yil 8-noyabr kuni Ar-Riyod shahrida imzolangan Oʻzbekiston Respublikasi Hukumati va BMT Turizm oʻrtasida Oʻzbekiston Respublikasi Samarqand shahrida Butunjahon turizm tashkilotining “Ipak yoʻlida turizm” tematik ofisini taʼsis etish toʻgʻrisidagi bitim tasdiqlansin.

2. Turizm qoʻmitasi ushbu xalqaro shartnomani amalga oshirish uchun masʼul boʻlgan vakolatli organ etib belgilansin.

3. Tashqi ishlar vazirligi Oʻzbekiston Respublikasi tomonidan mazkur xalqaro shartnomaning kuchga kirishi uchun zarur boʻlgan davlat ichki tartib-taomillari bajarilganligi hamda uni amalga oshirish uchun masʼul boʻlgan vakolatli organ toʻgʻrisida BMT Turizm kotibiyatiga tegishli bildirishnoma yuborsin.

4. Vazirlar Mahkamasi hamda tegishli vazirlik va idoralarning rahbarlari mazkur xalqaro shartnoma kuchga kirgandan keyin uning qoidalari bajarilishi ustidan belgilangan tartibda nazoratni taʼminlasin.

5. Ushbu qarorning ijrosini nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 20-aprel,

PQ-147-son