HuquqTech
“Lasyetti” avtomobilining yangi modelini Oʻzbekiston Respublikasi bozoriga olib chiqish, “OʻzDEUavto” AJ va mahsulotlar mahalliylashtiriladigan zavodlarda texnologiya ishlarini yanada takomillashtirish maqsadida:
1. Quyidagilar:
2003-2004-yillarda “OʻzDEUavto” aksiyadorlik jamiyati tomonidan 820 ta “Lasyetti” avtomobili ishlab chiqarilgani va respublikaning ichki bozorida sotilgani;
Mahsulot sertifikatlangani, “Lasyetti” avtomobillarining issiq iqlim sharoitlaridagi va yonilgʻi tejash sinovlari nihoyasiga yetkazilgani;
“Oʻzavtosanoat” aksiyadorlik jamiyati tomonidan “Jeneral Motors DEU Avto va Texnologiyalar” kompaniyasi bilan kelishilgan holda “Lasyetti” modelini yirik blokli yigʻishdan toʻliq ishlab chiqarish sikliga oʻtish texnologiyasi boʻyicha ishlab chiqarishni oʻzlashtirish rejasi ishlab chiqilayotgani;
“OʻzDEUavto” AJ bilan “Jeneral Motors DEU Avto va Texnologiyalar” kompaniyasi oʻrtasida tuzilgan konraktlarga muvofiq 2005-yil yanvaridan boshlab 3008 ta avtomobilga butlovchi detallarning yirik blokli uzellari yetkazib berilayotgani maʼlumot uchun qabul qilinsin.
2. “Oʻzavtosanoat” aksiyadorlik kompaniyasi bir oy muddatda “Lasyetti” modelini ichki va tashqi bozorlarda sotish istiqbollarini oʻrganish maqsadida marketing tadqiqotlarini oʻtkazsin hamda “Lasyetti” modelini ishlab chiqarishni oʻzlashtirish rejasiga muvofiq, sotish hajmlarini taʼminlaydigan tadbirlarni tayyorlasin.
3. 3008 ta “Lasyetti” avtomobilini yigʻish uchun “OʻzDEUavto” AJ bilan “Jeneral Motors DEU Avto va Texnologiyalar” kompaniyasi oʻrtasidagi kontraktlar boʻyicha olib kelinadigan butlovchi detallar va uzellar 2005-yilda, istisno tariqasida, bojxona toʻlovlar toʻlashdan (bojxona rasmiylashtiruvi uchun yigʻimlardan tashqari) ozod qilinsin.
4. Ushbu Qarorning ijrosini nazorat qilish Oʻzbekiston Respublikasi Bosh vazirining oʻrinbosari Oʻ.T. Sultonov zimmasiga yuklatilsin.
Oʻzbekiston Respublikasi Prezidenti I. KARIMOV
Toshkent sh.,
2005-yil 29-mart,
PQ-39-son