HuquqTech
Mamlakatda elektrotexnika sanoatini ilm-fan va ishlab chiqarish integratsiyasi orqali jadal rivojlantirish, sohaga ilgʻor texnologiyalarni keng jalb etish, mahalliy korxonalarning global qoʻshilgan qiymat zanjirlari va tashqi bozorlarga integratsiyalashuvini kuchaytirish hamda tarmoqda zamonaviy sanoat ekotizimini shakllantirish maqsadida qaror qilaman:
I. Maqsadlar
1. Quyidagilar 2030-yilga qadar elektrotexnika sanoatini rivojlantirishning asosiy maqsadli koʻrsatkichlari etib belgilansin:
(a) tarmoqda ishlab chiqarish hajmini 130 trillion soʻmga, eksport hajmini 5 milliard AQSH dollariga yetkazish;
(b) 3 milliard AQSH dollari miqdorida investitsiyalarni jalb etish hamda tarmoqdagi bandlikni 50 ming kishiga yetkazish;
(v) sohada keng koʻlamli ilmiy-texnologik transformatsiyani amalga oshirish, mis xomashyosidan qoʻshilgan qiymatli mahsulotlar ishlab chiqarish darajasini 35 foizga olib chiqish;
(g) budjet buyurtmachilari tomonidan amalga oshiriladigan davlat xaridlari doirasida elektrotexnika mahsulotlari boʻyicha mahalliy mahsulot ulushini 70 foizga yetkazish.
II. Korxonalarni moliyaviy qoʻllab-quvvatlash choralari va imtiyozlar
2. Belgilansinki, 2026-yil 1-oktabrdan boshlab elektrotexnika sanoati korxonalari uchun:
(a) aylanma mablagʻlar bilan taʼminlashga tijorat banklari orqali quyidagi shartlarda kreditlar ajratiladi:
(i) “Savdoni rivojlantirish kompaniyasi” aksiyadorlik jamiyati (keyingi oʻrinlarda — Kompaniya) mablagʻlari hisobidan 2 yil muddatgacha 3 oylik imtiyozli davr bilan yillik 6 foiz (shundan 2 foiz bank marjasi) stavkada bitta tadbirkorlik subyekti uchun koʻpi bilan 5 million AQSH dollari miqdorida. Bunda kredit qarzdorligi korxona tomonidan birinchi yilda soʻndirilgan taqdirda kredit foizi yillik 4 foiz (shundan 1 foiz bank marjasi) stavkada qayta hisob-kitob qilinadi;
(ii) kreditning 50 foiziga, biroq 20 milliard soʻm ekvivalentidan oshmagan miqdorda “Biznesni kafolatlash milliy kompaniyasi” AJ hisobidan kafillik, qolgan qismiga — korxona tomonidan likvidli mol-mulk, sugʻurta polisi, eksport shartnomasi (kelgusidagi pul tushumlariga talab huquqi asosida) va/yoki boshqa turdagi taʼminot taqdim etiladi;
(b) birja savdolari orqali mis xomashyosini xarid qilishda hisob-kitob qilishning quyidagi tartibi joriy qilinadi:
(i) Oʻzbekiston Respublikasi Prezidentining 2025-yil 15-oktabrdagi PQ-304-son qarorining 6-bandiga muvofiq ajratilgan mablagʻlarning oʻzlashtirilmagan qismi hisobidan Kompaniya tomonidan “Oʻzsanoateksport” AJga toʻgʻridan-toʻgʻri 40 million AQSH dollari miqdorida mablagʻ ajratiladi;
(ii) birja savdolarida mis xomashyosini xarid qilishda 25 foiz toʻlov korxona tomonidan, qolgan 75 foiz toʻlov “Oʻzsanoateksport” AJ tomonidan uch kun ichida amalga oshiriladi. Bunda bitta tadbirkorlik subyektining “Oʻzsanoateksport” AJ oldidagi qarzdorligi 3 million AQSH dollaridan ortiq boʻlishiga yoʻl qoʻyilmaydi;
(iii) korxonalar tomonidan “Oʻzsanoateksport” AJ oldidagi majburiyatini taʼminlash uchun sugʻurta polisi taqdim etiladi;
(iv) “Oʻzsanoateksport” AJ tomonidan amalga oshirilgan 75 foiz miqdoridagi toʻlov korxonalar tomonidan 90 kun ichida qaytariladi. Bunda kechiktirib toʻlash imkoniyati berilgan har bir kun uchun yillik 6 foiz stavkada foiz hisoblanadi.
3. Mazkur qarorning 2-bandida koʻrsatilgan moliyaviy qoʻllab-quvvatlash choralari uchun:
(a) Tiklanish va taraqqiyot jamgʻarmasi korxonalarni aylanma mablagʻ bilan taʼminlash maqsadlariga Kompaniyaga 2030-yil 1-yanvarga qadar qaytarish sharti bilan yillik 2 foiz stavkada 50 million AQSH dollari miqdorida, shundan 20 million AQSH dollarini bir oy muddatda, qolgan qismini 2027-yildan boshlab Kompaniyaning buyurtmanomalari asosida Oʻzbekiston Respublikasi Prezidentining 2024-yil 10-yanvardagi PQ-15-son qarorining 4-bandida belgilangan mablagʻlarning oʻzlashtirilmagan qismi hisobidan bosqichma-bosqich ajratishni taʼminlasin;
(b) Investitsiyalarni jalb qilish, sanoatni rivojlantirish va savdoni tartibga solish masalalari boʻyicha Hukumat komissiyasi (J. Xodjayev) ikki hafta muddatda birja savdolari orqali mis xomashyosini xarid qilishda hisob-kitoblarni “Oʻzsanoateksport” AJ orqali amalga oshirish tartibini tasdiqlasin.
4. Shunday tartib oʻrnatilsinki, unga muvofiq 2026 — 2028-yillarda elektrotexnika sanoatida amalga oshiriladigan investitsiya loyihalariga tijorat banklari tomonidan ajratiladigan kreditlar boʻyicha “Tadbirkorlikni rivojlantirish kompaniyasi” AJ tomonidan Kredit foiz xarajatlarini kompensatsiya qilish jamgʻarmasi hisobidan, kredit miqdoridan qatʼi nazar, uning 20 milliard soʻm ekvivalentidan oshmagan qismi boʻyicha:
(a) barqarorlik reytingi va hudud toifasidan qatʼi nazar, barcha toifadagi tadbirkorlik subyektlariga 3 yil muddatga quyidagi miqdorlarda kompensatsiya taqdim etiladi:
(i) foiz stavkasi Markaziy bank asosiy stavkasining ikki baravaridan ortiq boʻlmagan milliy valyutadagi kreditlarning asosiy stavkadan 4 foiz punkt yuqori qismi, biroq 10 foiz punktdan oshmagan miqdorda;
(ii) xorijiy valyutadagi kreditlar foiz stavkasining 6 foizdan yuqori qismi, biroq 5 foiz punktdan oshmagan miqdorda;
(b) kompensatsiya “2+1” tamoyili asosida dastlabki ikki yilga taqdim etiladi, mahsulot (xizmat)larni realizatsiya qilishdan tushgan yillik tushum avvalgi yilning mos davriga nisbatan 15 foiz va undan ortiq miqdorda oshgan taqdirda, kompensatsiya uchinchi yilda ham toʻlab beriladi.
5. Iqtisodiyot va moliya vazirligi hamda Investitsiyalar, sanoat va savdo vazirligining elektrotexnika mahsulotlari ishlab chiqaruvchilar tomonidan oʻz ehtiyojlari uchun respublika hududiga olib kiriladigan polietilen granulalarini 2028-yil 1-yanvarga qadar aksiz soligʻidan ozod qilish toʻgʻrisidagi taklifiga rozilik berilsin.
6. Tadbirkorlik subyektlariga investitsiya dasturi doirasida amalga oshirilgan va foydalanishga qabul qilingan elektrotexnika sanoati yoʻnalishidagi yangi loyihalar boʻyicha ishlab chiqarish binolari hamda texnologik uskunalarni ular foydalanishga qabul qilingan sanadan boshlab uch yil davomida tezlashtirilgan amortizatsiya qilish huquqi berilsin.
III. Tayanch investorlarni jalb qilish
7. Belgilab qoʻyilsinki, elektrotexnika, elektronika va robototexnika sohalarida soʻnggi uch yilda “Forbes Global 2000” xalqaro reytingi va xalqaro yetkazib berish zanjirlariga kirgan hamda kiritadigan investitsiya hajmi kamida 50 million AQSH dollari boʻlgan tayanch investorlarni (Anchor Investor) jalb etish maqsadida:
(a) investitsiya shartnomasida qoʻshilgan qiymatni uch yilda 40 foizdan oshirish hamda yillik foydaning kamida 3 foizini ilmiy-tadqiqot va tajriba-konstruktorlik ishlariga yoʻnaltirish majburiyati nazarda tutiladi;
(b) respublikada xalqaro tajribaga muvofiq tashkil etilgan maxsus iqtisodiy zonalardan binolar “tayyor holda topshirish” modeli boʻyicha (elektr tarmogʻi, gaz, suv, tozalash inshootlari, temir yoʻl kommunikatsiyalari bilan taʼminlangan holda) ajratiladi;
(v) investorlarni jalb etish, investitsiya loyihalarini baholash, muzokaralar olib borish, investitsiya shartnomalarini tayyorlash hamda ularning amalga oshirilishini monitoring qilish jarayonlariga jalb etiladigan xalqaro konsalting kompaniyalarining xizmatlari qonunchilikda belgilangan tartibda moliyalashtiriladi;
(g) investorlarga yer soligʻi, mol-mulk soligʻi, foyda soligʻini toʻlashdan 10 yil muddatga ozod etish tarzidagi imtiyozlar taqdim etiladi.
8. Investitsiyalar, sanoat va savdo vazirligi Tashqi ishlar vazirligi, “Oʻzeltexsanoat” uyushmasi bilan birgalikda asosan tayanch investorlarni jalb qilish uchun xorijiy davlatlarda keng miqyosda targʻibot ishlarini tashkillashtirish, shuningdek, xalqaro forumlarda taqdimotlar (“Road Show”) oʻtkazib borish choralarini koʻrsin.
IV. Tarmoqda butlovchi buyumlar va ehtiyot qismlar ishlab chiqarish hamda yondosh sanoat tarmoqlarini rivojlantirish
9. Sanoat kooperatsiyasi va davlat xaridlari agentligi 2026-yil yakuniga qadar oʻzining Yagona elektron platformasida (keyingi oʻrinlarda — Platforma) “Oʻzeltexsanoat” uyushmasi bilan birgalikda mahalliy korxonalar tomonidan ishlab chiqarilgan elektrotexnika mahsulotlari uchun zarur boʻlgan xomashyo, materiallar, butlovchi qismlar va asbob-uskunalar hamda yondosh sanoat tarmoqlari mahsulotlari toʻgʻrisidagi maʼlumotlarni jamlash, tahlil qilish, shuningdek, yetkazib beruvchilar va xaridorlar oʻrtasida kooperatsiya aloqalarini yoʻlga qoʻyish imkonini beruvchi alohida modul ishga tushirilishini taʼminlasin.
10. Belgilansinki, Sanoat kooperatsiyasi va davlat xaridlari agentligi boshqaruv kengashi tomonidan tavsiya etiladigan elektrotexnika sanoati uchun respublikada ishlab chiqarilmaydigan butlovchi va ehtiyot qismlarni oʻzlashtirgan mahalliy yetkazib beruvchilarga Sanoat kooperatsiyasini rivojlantirish davlat maqsadli jamgʻarmasi mablagʻlari hisobidan ishlab chiqarish loyihasi doirasida xarid qilingan asbob-uskunalar qiymatining 30 foizigacha, biroq bitta tadbirkorlik subyekti uchun bir yilda bir marotaba 10 milliard soʻmdan koʻp boʻlmagan miqdorda subsidiya ajratiladi.
11. Sanoat kooperatsiyasi va davlat xaridlari agentligi har yili kamida bir marotaba elektrotexnika mahsulotlari uchun xomashyo, materiallar, butlovchi qismlar va asbob-uskunalar hamda yondosh sanoat tarmoqlari mahsulotlari sanoat zanjiri koʻrgazmasini Sanoat kooperatsiyasi va davlat xaridlari agentligi faoliyatiga koʻmaklashish jamgʻarmasi hamda Agentlik huzuridagi tashkilotlar mablagʻlari hisobidan tashkil etib borsin.
12. Iqtisodiyot va moliya vazirligi hamda Sanoat kooperatsiyasi va davlat xaridlari agentligining quyidagi takliflari maʼqullansin:
(a) Oʻzbekiston Respublikasi Prezidentining 2024-yil 10-yanvardagi “Elektrotexnika sanoatining ishlab chiqarish va eksport salohiyatini yanada oshirishga doir qoʻshimcha chora-tadbirlar toʻgʻrisida”gi PQ-15-son qarorning 6-bandida nazarda tutilgan soliq imtiyozlari muddatini 2030-yil 1-yanvarga qadar uzaytirish;
(b) 2027-yil 1-yanvardan 2030-yil 1-yanvarga qadar Platformada roʻyxatdan oʻtgan elektrotexnika tarmogʻi korxonalariga xomashyo, materiallar, butlovchi qismlar va asbob-uskunalarni yetkazib beruvchi mahalliy ishlab chiqaruvchilarga mol-mulk soligʻi boʻyicha stavkani 50 foizga kamaytirish tarzida soliq imtiyozini quyidagi shartlarda taqdim etish:
(i) hisobot (soliq) davri yakunlari boʻyicha ushbu kichik bandda nazarda tutilgan mahsulotlarni realizatsiya qilishdan tushgan tushum miqdori umumiy tushum hajmining 50 foizidan kam boʻlmasligi;
(ii) davlat korxonalari hamda ustav fondida (ustav kapitalida) davlat ulushi 50 foiz miqdorda va undan ortiq boʻlgan yuridik shaxslarga tatbiq etmaslik.
V. Sanoat tarmoqlarida ilmiy-tadqiqot ishlari, innovatsiyalar va ularni tijoratlashtirishni qoʻllab-quvvatlash
13. Sanoat korxonalarining ilmiy-tadqiqot, innovatsion-eksport faoliyati va sanoatda yuqori texnologiyalarni joriy etishni qoʻllab-quvvatlash maqsadida Davlat aktivlarini boshqarish agentligi muassisligida “Toʻrtinchi sanoat inqilobi ilmiy-tadqiqot va innovatsiyalar markazi” davlat muassasasi (keyingi oʻrinlarda — Markaz) tashkil etilsin.
14. Markazning asosiy vazifalari va faoliyatining ustuvor yoʻnalishlari 1-ilovaga muvofiq tasdiqlansin.
15. Markaz faoliyatini samarali tashkil etish maqsadida:
(a) Vazirlar Mahkamasi ikki oy muddatda Markaz faoliyatini tashkil etish boʻyicha Hukumat qarorini qabul qilsin;
(b) Toshkent shahar hokimligi Markaz uchun zarur yer maydonini ajratsin;
(v) Markaz faoliyatini umumiy boshqarish vakolati “Oʻzeltexsanoat” uyushmasi va Iqtisodiyot va moliya vazirligi zimmasiga yuklatilsin;
(g) “Oʻzeltexsanoat” uyushmasi Iqtisodiyot va moliya vazirligi, Investitsiyalar, sanoat va savdo vazirligi bilan birgalikda:
(i) Markazni unga yuklatilgan vazifalarni professional darajada amalga oshirish qobiliyatiga ega boʻlgan malakali kadrlar bilan toʻldirish choralarini koʻrsin;
(ii) Markaz faoliyatini dastlabki uch yil davomida boshqarish uchun sohada ilgʻor tajribaga ega chet el kompaniyasini jalb qilsin.
16. Iqtisodiyot va moliya vazirligi:
(a) Markaz faoliyatini tashkil etish, uni moddiy-texnika bazasi bilan taʼminlash, zarur asbob-uskunalar va jihozlarni xarid qilish, shuningdek, bino qurish va taʼmirlash ishlari, chet el kompaniyasining boshqaruv xarajatlarini moliyalashtirish uchun ikki oy muddatda 2026-yilda respublika budjetining xarajatlarini maqbullashtirish hisobidan 20 milliard soʻm, 2027-yilda respublika budjetidan 60 milliard soʻm mablagʻ ajratsin;
(b) kelgusi yillarda Markaz faoliyati boʻyicha xarajatlarni respublika budjetida koʻzda tutib borsin.
17. “Oʻzeltexsanoat” uyushmasi, Oliy taʼlim, fan va innovatsiyalar vazirligi, Iqtisodiyot va moliya vazirligi, Fanlar akademiyasi, Innovatsion rivojlanish agentligi ikki oy muddatda elektrotexnika sanoati yoʻnalishidagi startap loyihalar paketini shakllantirib, ularni inkubatsiya yoki akseleratsiya dasturlarida ishtirok etishi uchun “UzVC” milliy venchur fondiga kiritsin.
Bunda:
(a) istiqbolli startap loyihalar inkubatsiya yoki akseleratsiya dasturlarida qatnashishi bilan bogʻliq xarajatlar “UzVC” milliy venchur fondi hisobidan moliyalashtiriladi;
(b) istiqbolli startap loyihalar boʻyicha prototiplarni tayyorlash, ularni laboratoriya sinovlari va boshqa sinovlardan oʻtkazish uchun Markaz imkoniyatlaridan bepul foydalanish hamda Markaz mutaxassislaridan bepul maslahatlar olishga ruxsat etiladi.
18. “UzVC” milliy venchur fondi 2027-yildan boshlab har yili inkubatsiya yoki akseleratsiya dasturlarida ishtirok etgan elektrotexnika sanoati yoʻnalishidagi kamida 10 tadan istiqbolli startap loyihalarga xususiy sektor yoki xorijiy venchur fondlar bilan hamkorlikda investitsiya kiritish choralarini koʻrsin. Bunda 2027-yildan boshlab mazkur xarajatlar uchun 10 milliard soʻm respublika budjeti hisobidan mablagʻ ajratish nazarda tutilsin.
VI. Qaror ijrosini tashkil etish, taʼminlash va nazorat
19. Iqtisodiyot va moliya vazirligi uch oy muddatda quyidagilarni Vazirlar Mahkamasiga kiritsin:
(a) Soliq qoʻmitasi bilan birgalikda Soliq kodeksiga mazkur qarorning 5-bandi, 7-bandi “g” kichik bandi va 12-bandi “a” kichik bandidan kelib chiqadigan oʻzgartirish va qoʻshimchalar kiritishni nazarda tutuvchi qonun loyihasini;
(b) manfaatdor vazirlik va idoralar bilan birgalikda qonunchilik hujjatlariga ushbu qarordan kelib chiqadigan oʻzgartirish va qoʻshimchalar yuzasidan takliflarni.
20. Elektrotexnika sanoatiga investitsiyalarni keng jalb etish, yangi quvvatlarni barpo etish, kooperatsiya aloqalarini mustahkamlash, eksport faoliyatini qoʻllab-quvvatlash boʻyicha “yoʻl xaritasi” 2-ilovaga muvofiq tasdiqlansin.
21. Oʻzbekiston Respublikasi Prezidentining va Oʻzbekiston Respublikasi Hukumatining ayrim hujjatlariga 3-ilovaga muvofiq oʻzgartirish va qoʻshimchalar kiritilsin.
22. Mazkur qaror ijrosini samarali tashkil qilishga masʼul va shaxsan javobgar etib Bosh vazir oʻrinbosarlari J.A. Qoʻchqorov va J.A. Xodjayev belgilansin.
23. Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2026-yil 12-sentabr,
PQ-325-son
Oʻzbekiston Respublikasi Prezidentining 2026-yil 12-sentabrdagi PQ-325-son qaroriga1-ILOVA
“Toʻrtinchi sanoat inqilobi ilmiy-tadqiqot va innovatsiyalar markazi” davlat muassasasining asosiy vazifalari va faoliyatining ustuvor yoʻnalishlari
1. Kichik va oʻrta tadbirkorlik subyektlarining xalqaro tenderlarda ishtirok etishi, tashqi bozorlarga chiqishiga koʻmaklashish, shuningdek, xorijiy davlatlarda doimiy faoliyat yurituvchi savdo vakillari orqali milliy mahsulotlarni ilgari surish.
2. Sanoat korxonalariga zamonaviy ishlab chiqarish texnologiyalari, eksport koʻnikmalari, xalqaro standart va sertifikatlash yoʻnalishlari boʻyicha injiniring va konsalting xizmatlarini koʻrsatish.
3. Yangi turdagi mahsulotlarning raqamli zanjirini yaratish (CAD/CAM/CAE asosida), prototiplash, additiv texnologiyalar, revers-injiniring, texnologiyalarni mahalliylashtirish, kichik seriyali namunalar tayyorlash, shuningdek, amaliy ilmiy-tadqiqot va tajriba-konstruktorlik ishlarini amalga oshirish.
4. Sanoat korxonalarining texnologik salohiyatini oshirish uchun markazning yuqori texnologik uskunalari, sinov-oʻlchov laboratoriyalari va injiniring infratuzilmasidan umumiy foydalanish imkoniyatini yaratish.
5. Yangi mahsulotlarni ishlab chiqarish boʻyicha innovatsion gʻoyalar va ilmiy ishlanmalarning texnologik tayyorlik darajasini (Technology Readiness Level — TRL) baholash, investorlar va sanoat korxonalari bilan hamkorlikda texnologiyalarning tayyorgarlik darajasini bosqichma-bosqich oshirish.
6. Sanoat korxonalarida kompleks energiya auditlarini oʻtkazish, energiya sarfi tahlilini amalga oshirish, ISO 50001 xalqaro standarti talablariga muvofiq energiya menejmenti tizimlarini joriy etishga amaliy koʻmaklashish.
7. Ishlab chiqarish tannarxini pasaytirish va resurs samaradorligini oshirish boʻyicha texnologik jarayonlarni optimallashtirish, elektr energiyasi, tabiiy gaz, suv va boshqa resurslar sarfini kamaytirish, mahsulot tannarxini pasaytirishga qaratilgan texnik-iqtisodiy yechimlar ishlab chiqish hamda ularni amaliyotga tatbiq etish.
Oʻzbekiston Respublikasi Prezidentining 2026-yil 12-sentabrdagi PQ-325-son qaroriga2-ILOVA
Elektrotexnika sanoatiga investitsiyalarni keng jalb etish, yangi quvvatlarni barpo etish, kooperatsiya aloqalarini mustahkamlash, eksport faoliyatini qoʻllab-quvvatlash boʻyicha
Oʻzbekiston Respublikasi Prezidentining 2026-yil 12-sentabrdagi PQ-325-son qaroriga3-ILOVA
Oʻzbekiston Respublikasi Prezidentining va Oʻzbekiston Respublikasi Hukumatining ayrim hujjatlariga kiritilayotgan oʻzgartirish va qoʻshimchalar
1. Oʻzbekiston Respublikasi Prezidentining 2019-yil 30-maydagi “Elektrotexnika sanoatini yanada rivojlantirish uchun qulay shart-sharoitlar yaratish va tarmoqning investitsiyaviy hamda eksport salohiyatini oshirish boʻyicha qoʻshimcha chora-tadbirlar toʻgʻrisida”gi PQ-4348-son qarorining 9-bandidagi “2027” raqami “2030” raqami bilan almashtirilsin.
2. Oʻzbekiston Respublikasi Prezidentining 2022-yil 25-iyuldagi PQ-332-son qarori bilan tasdiqlangan Davlat xaridiga doir tender boʻyicha xarid qilish hujjatlarini va texnik topshiriqlarni kompleks ekspertizadan oʻtkazish tartibi toʻgʻrisidagi nizomning 5-bandi quyidagi mazmundagi oʻninchi xatboshi bilan toʻldirilsin:
“Markaz elektrotexnika mahsulotlarini budjet buyurtmachilari tomonidan amalga oshiriladigan davlat xaridlari boʻyicha xarid qilish hujjatlarini ekspertizadan oʻtkazish jarayonida xarid predmetining mahalliy ishlab chiqaruvchilarda mavjudligi yuzasidan oʻrganish oʻtkazadi va natijalarini ekspertiza xulosasida koʻrsatadi”.
3. Oʻzbekiston Respublikasi Prezidentining 2024-yil 10-yanvardagi “Elektrotexnika sanoatining ishlab chiqarish va eksport salohiyatini yanada oshirishga doir qoʻshimcha chora-tadbirlar toʻgʻrisida”gi PQ-15-son qarorida:
(a) 4-bandning birinchi xatboshisidagi “2026” raqami “2028” raqami bilan almashtirilsin;
(b) 6-bandning birinchi xatboshisidagi “2027” raqami “2030” raqami bilan almashtirilsin.
4. Oʻzbekiston Respublikasi Prezidentining 2024-yil 19-fevraldagi “Respublikada mis xom ashyosini chuqur qayta ishlashni yanada jadallashtirish chora-tadbirlari toʻgʻrisida”gi PQ-77-son qaroriga 1-ilova quyidagi tahrirda bayon etilsin:
“Oʻzbekiston Respublikasi Prezidentining 2024-yil 19-fevraldagi PQ-77-son qaroriga1-ILOVA
Mis xom ashyosini chuqur qayta ishlash korxonalari faoliyatini oʻrganish boʻyicha komissiya
Izohlar:
Komissiya aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli funksiyalarni bajarish yuklangan shaxslar kiritiladi.
Komissiya ishiga boshqa davlat organlari va xoʻjalik yurituvchi subyektlarning vakillari jalb qilinishi mumkin”.
5. Vazirlar Mahkamasining 2022-yil 20-maydagi 276-son qarori bilan tasdiqlangan Davlat xaridlarini amalga oshirish bilan bogʻliq tartib-taomillarni tashkil etish va oʻtkazish tartibi toʻgʻrisidagi nizom quyidagi mazmundagi 37-2-band bilan toʻldirilsin:
“37-2. Davlat xaridlarida elektrotexnika mahsulotlarini (kuchlanishli kabellar va texnik maqsadli qurilmalar) yetkazib berish muddati oʻttiz kundan kam boʻlmasligi kerak. Bunda yetkazib beruvchi tovarlarni shartnomada belgilangan muddatdan oldin yetkazib berishi mumkin”.