HuquqTech
2015-yil uchun soliq va budjet siyosatining asosiy yoʻnalishlari qabul qilinishi munosabati bilan:
1. Oʻzbekiston Respublikasi Prezidentining ayrim farmonlariga 2015-yilning 1-yanvaridan boshlab ilovaga muvofiq oʻzgartishlar kiritilsin.
2. Mazkur Farmonning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.
Oʻzbekiston Respublikasi Prezidenti I. KARIMOV
Toshkent sh.,
2014-yil 9-dekabr,
PF-4677-son
Oʻzbekiston Respublikasi Prezidentining 2014-yil 9-dekabrdagi PF-4677-sonli Farmoniga ILOVA
Oʻzbekiston Respublikasi Prezidentining ayrim farmonlariga 2015-yilning 1-yanvaridan boshlab kiritiladigan oʻzgartishlar
1. Oʻzbekiston Respublikasi Prezidentining “Mikrokreditbank” aksiyadorlik tijorat bankini tashkil etish toʻgʻrisida” 2006-yil 5-maydagi PF-3750-sonli Farmoni 8-bandining birinchi xatboshidagi “2015” raqami “2018” raqami bilan almashtirilsin.
2. Oʻzbekiston Respublikasi Prezidentining “Taʼlim muassasalarining bitiruvchilarini tadbirkorlik faoliyatiga jalb etish borasidagi qoʻshimcha chora-tadbirlar toʻgʻrisida” 2010-yil 28-iyuldagi PF-4232-sonli Farmoni 1-bandining birinchi xatboshidagi “20” raqami “50” raqami bilan almashtirilsin.
(3-band Oʻzbekiston Respublikasi Prezidentining 2018-yil 3-maydagi PF-5428-sonli Farmoniga asosan oʻz kuchini yoʻqotgan — Qonun hujjatlari maʼlumotlari milliy bazasi, 04.05.2018-y., 06/18/5428/1158-son)
4. Oʻzbekiston Respublikasi Prezidentining “Oʻzbekiston Respublikasida investitsiya iqlimi va ishbilarmonlik muhitini yanada takomillashtirishga doir qoʻshimcha chora-tadbirlar toʻgʻrisida” 2014-yil 7-apreldagi PF-4609-sonli Farmoni 8-bandining uchinchi xatboshi quyidagi tahrirda bayon etilsin:
“yangidan tashkil etilgan kichik tadbirkorlik subyektlari (chakana savdo tashkilotlaridan tashqari) davlat roʻyxatidan oʻtgan sanadan boshlab, 6 oy davomida, agar mazkur muddatda ular oʻz ehtiyojlari uchun obyektlar qurgan taqdirda, qurib bitkazilgan obyektni qabul qilish hujjati tasdiqlangan sanadan boshlab 6 oy oʻtgungacha, biroq ularning davlat roʻyxatidan oʻtganidan soʻng bir yildan koʻp boʻlmagan davrda yagona soliq toʻlovi va yagona ijtimoiy toʻlovlarni ushbu toʻlovlarning tasdiqlangan eng kam miqdorlarini hisobga olmagan holda toʻlaydilar.”